જીવતી

થાકી જતાં ક્યાં થોભતી ? 

ધન દોલતે ક્યાં લોભતી ? 

દાહો દબાવી જીવતી, 

કરજો કદર એ સ્ત્રી તણી ! 

બે બોલ બસ સહવાસથી, 

માંગી રહે મીઠાશથી, 

વાદો થમાવી જીવતી, 

કરજો કદર એ સ્ત્રી તણી ! 

રીતે સદા હીંચી રહી, 

ભાતે ભલા સીંચી રહી, 

ધારો ટકાવી જીવતી, 

કરજો કદર એ સ્ત્રી તણી ! 

ધરબારને સંભાળતી, 

દુઃખ ને દરદ ઓગાળતી, 

ખ્વાબો સજાવી જીવતી, 

કરજો કદર એ સ્ત્રી તણી ! 

મહિયર સરારે છોડતી, 

પતિઘર ધરારે જોડતી, 

માળો બનાવી જીવતી, 

કરજો કદર એ સ્ત્રી તણી ! 

જીવે સદીઓથી નમી, 

સ્ત્રી કોકિલા એથી ગમી, 

શ્વાસો જગાવી જીવતી, 

કરજો કદર એ સ્ત્રી તણી !