જીંદગી ઘણી સારી છે

થોડી મારી છે થોડી તારી છે,

આ જીંદગી ઘણી સારી છે,

ક્યારેક એ મગજનું દહીં છે,

ક્યારેક તીખી તિખારી છે.

હોય છે ક્યારેક મીઠી લછ્છી,

ક્યારેક લછ્છી ખારી છે,

આમ કહો કે તેમ કહો પણ,

આ જીંદગી ઘણી સારી છે.

થોડી હતી એ સરળ અને,

પછી થોડી આપણે મઠારી છે,

ક્યારેક પાલખી હાથીની, 

ને ક્યારેક સિંહની સવારી છે.

અવગુણ એના ચિત ન ધરો, 

એ નાની રાજકુમારી છે,

હશે જરા તોફાની પણ,  

આ જીંદગી ઘણી સારી છે.

થોડી ચિંતા પણ છે એ, 

અને થોડી એ ખુમારી છે , 

ક્યારેક લાગે મૌન અકળ, 

ને ક્યારેક ખોટી લવારી છે.

હોય છે ક્યારેક સુખસાગર, 

કોઈ દી દુ:ખની પટારી છે,

દિવસો "સ્તબ્ધ" સરખા નથી,

પણ જીંદગી ઘણી સારી છે,