ઝરૂખે બેઠી

હીંચકે ઝૂલતી ઝરુખે આજ હું બેઠી,

બે પળોને પોતાની પોતાના માટે જ માગી બેઠી,

શાંત ચિત્તે શમણાંનાં સ્મરણો એ જઈ બેઠી,  

મોંઘા એ વાતા વાયરાઓનાં માર્ગો સુરજને પૂછી બેઠી,

નિત્ય કંટકોની કેડીને પુષ્પતણી સેજ ઝંખીને બેઠી,

વરસતી વિપત્તિઓને આકાશી જળધાર સમજી બેઠી.

દૈત્ય શા એ ડુંગરાઓને, નદીઓ નાગણ સમજી બેઠી,

ને એ નદીઓ તરવા કાયાની આકરી કસોટી કરી બેઠી.

વિપત્તિ એ જ ખીલે છે પુરુષાર્થ મારું એ જાણી બેઠી,

વિહરવા એ પંથોને ખૂટતાં માર્ગ શોધતી બેઠી.

નમતી એ સંધ્યાના સૂરજે ક્ષિતિજને શોધતી બેઠી,

મારા ખોવાયેલાં એ જીવનની બે પળોને શોધતી બેઠી.

હીંચકો ઝૂલતી આજે હું એ ક્ષણોને શોધતી બેઠી,

વીતી ગયેલા જીવનના શમણાંમાં ખુદને જ ખોઈ બેઠી !