ઇન્ગ્રેચીમાં કરજો -

ઇન્ગ્રેચીમાં કરજો મારા શ્વાસોનો તરજૂમો!

ગુજરાતીમાં નૈ ઊકલે રે અક્ષર અક્ષર ડૂમો!

ઇન્ગ્રેચીમાં ડૂસકાં ન ફાવે તો રે'વા દેજો...

ગુજરાતીમાં ઈ અક્ષરને સાત સલામી દેજો!

સપનાં ટોળા - મોઢે રેતીમાં છે ચૂમો - ચૂમો!

ગુજરાતીમાં નૈ ઊકલે રે અક્ષર અક્ષર ડૂમો!

ઇન્ગ્રેચીમાં આંસુ ટીઅરગેસ થઈને નડશે!

ગુજરાતીમાં આંસુ ઝાકળ - ધુમ્મસ થઇ નીતરશે!

રસ્તો - બસ્તો ગુમ થાય તો કેડી - કેડી ઘૂમો!

ઇન્ગ્રેચીમાં કરજો મારા શ્વાસોનો તરજુમો!