હસતો રમતો માણસ, મોબાઈલ થઈ ગયો

હસતો રમતો માણસ, મોબાઈલ થઈ ગયો...

આનંદી હતો, ને યંત્રવત્ થઈ ગયો,

સંબંધોને, 'લાઈક'થી, મુલવતો થઈ ગયો,

હસતો રમતો માણસ, મોબાઈલ થઈ ગયો !

લાખોની ભીડમાંય, અજાણ્યો થઈ ગયો,

'ફેસબુક'ને 'ટ્વિટર' પર, લોકપ્રિય થઈ ગયો,

હસતો રમતો માણસ, મોબાઈલ થઈ ગયો !

કુદરતની મહાનતા, સ્વીકારતાં ભૂલી ગયો,

'પ્રભાતે મોબાઈલ દર્શનમ્', કરતો થઈ ગયો,

હસતો રમતો માણસ, મોબાઈલ થઈ ગયો !

લાગણીને અભિવ્યક્ત, કરતાં ભૂલી ગયો,

ને, 'ઈમોજી'થી, કામ ચલાવતો થઈ ગયો,

હસતો રમતો માણસ, મોબાઈલ થઈ ગયો !

સાત્વિક ને પૌષ્ટિક, ભોજન ખાતાં ભૂલી ગયો,

'ઓનલાઈન ઓર્ડર', કરતો થઈ ગયો,

હસતો રમતો માણસ, મોબાઈલ થઈ ગયો !

પોતાની અસલ 'ચાહત' ને, મૂલવતાં ભૂલી ગયો,

મોબાઈલનાં વાદે, સરખામણી લોકોની, કરતો થઈ ગયો,

હસતો રમતો માણસ, મોબાઈલ થઈ ગયો !

આંગળીનાં ટેરવે, સંબંધ નિભાવતો થઈ ગયો,

ને...., હસતો રમતો માણસ, મોબાઈલ થઈ ગયો !