એ નજરથી નિરખો નહીં

આંખોને પણ પાંખો ફૂટે, એ નજરથી નિરખો નહીં,

મનના ઘોડા પળમાં છૂટે, એ નજરથી નિરખો નહીં.

સ્નેહભીની જાત કરવાની ટેવ અમને હતી નહીં,

અંગે અંગે પ્રેમ વછુટે, એ નજરથી નિરખો નહીં.

ખુલ્લા રણમાં દોટ લગાવે એવી સૂકી યાદો રાખું,

સૂકા રણમાં ઝરણું ફૂટે, એ નજરથી નિરખો નહીં.

શબ્દો તો અણીયાળો બાવળ, મીઠાસનો તો પત્તો નહીં,

શબ્દે શબ્દે ફૂલડાં મ્હોરે, એ નજરથી નિરખો નહીં.

અતડું અતડું જીવન કાઢી, કદીય કોઈમાં ભળતું નહીં,

આલિંગનમાં હાથ ઊઠે બે, એ નજરથી નિરખો નહીં.

સ્મિત સુનાના ચહેરા પર વસંત જેવું ફરતું નહીં,

ગાલો પર તો લજ્જા ફૂટે, એ નજરથી નિરખો નહીં.

થોર સરીખા કાંટાઓની ભોકાતી અણીયાળી જાત,

થોરના ટેરવે ગુલાબ ઊગે, એ નજરથી નિરખો નહીં.

અમાસના ઘોર અંધકારને, માની લઈ નિમિત્ત સઘળું,

પૂનમનું અજવાળું ગૂંથે, એ નજરથી નિરખો નહીં.