Library
દીપ તારા સ્મરણના
દીપ તારા સ્મરણના
1 min
311
મખમલી અંધારે પ્રગટે છે દીપ તારા સ્મરણનાં,
એકાંતમાં સહારો બને સંભારણા તારા સ્મરણનાં !
ઝખ્મો પુરાણા ખીલી જાય નિરવ સન્નાટામાં જ્યારે,
દિલને શાતા બક્ષે છે રોજ મલમ તારા સ્મરણનાં !
યુગોથી થિજેલો હિમાલય ઓગળે પછી અંતરમાં,
આંખોથી વહે વિરહ બની ઝરણાં તારા સ્મરણનાં !
તારા આગમનનો પગરવ ને અપલક મારી આંખો,
આભાસ છેતરે છે બની પડછાયા તારા સ્મરણનાં !
હવે તો પ્રણયમાં પણ થયો છે એક મહાપ્રલય,
મોતની ખબર બની ગુંજે ભણકારા તારા સ્મરણનાં !
એક પાનખર જુદાઈની, ને ખરે પીળા પર્ણો વ્યથાનાં,
પછી વિરહની વસંતમાં ઉઘડે પુષ્પો તારા સ્મરણનાં !
વ્યથાઓ હવે તો ફાવી ગઈ છે મુજને કૈક એ રીતે,
કે શબ્દોમાં ઘૂંટાયા છે દર્દ સઘળા તારા સ્મરણનાં !
"પરમ" મિલનના આભાસની હતી એ પરાકાષ્ઠા,
"પાગલ" કરી સરકી રહ્યા પાલવ તારા સ્મરણનાં !
