દે દુઆ
દે દુઆ
ઈશ્વર તણી રચના સુધી, પહોંચી શકું, એ દે દુઆ,
ઈશ્વર તણી રચના બધી, માણી શકું, એ દે દુઆ,
સંસારની આ વેલડી, માયા મહીં ખૂંપી ગઈ,
ઈશ્વર તણી રચના સકલ, જાણી શકું, એ દે દુઆ,
સત્કાર્યની ના છે સમજ, કુદરત અકળ છે એટલે,
ઈશ્વર તણી રચના મહત્ , ગાઈ શકું, એ દે દુઆ,
ના પૂણ્ય પિછાણું જગે, ના પાપને પણ ઓળખું,
ઈશ્વર તણી રચના પ્રખર, પામી શકું, એ દે દુઆ,
અપરાધ મારો ક્યાં થતો ? કે શાસ્ત્ર વચનો શું કહે ?
ઈશ્વર તણી રચના સચર, વાંચી શકું, એ દે દુઆ,
ધબકે હૃદયના શ્વાસમાં, હરદમ હવાની લહેર પર,
ઈશ્વર તણી રચના સભર, થામી શકું, એ દે દુઆ,
દે દિવ્યતા આંખે, અગોચર વિશ્વમાં કળવાં પ્રભુ,
ઈશ્વર તણી રચના અખિલ, ધારી શકું, એ દે દુઆ.