ચાલશે ને ?
ચાલશે ને ?
વાત અડધી પડધી કહું ને,
બીજું તારા ઉપર છોડી દઉં,
ચાલશે ને ?
વ્હાલ કરતાં અટકી જઉ,
તને અમથું મૂંઝાવા દઉં,
ચાલશે ને ?
થોડી શરતો રાખી લઉં,
થોડી રાહ જોવડાવી દઉં,
ચાલશે ને ?
કહે, મળવા આવી જઉં,
જોઈ તને પાછો વળી જઉં,
ચાલશે ને ?
આ હોઠોને ફફડાવી લઉં,
પછી આંખોને બોલવા દઉં,
ચાલશે ને ?
ત્યાં આવી ને સ્પર્શી જઉં,
તારી હથેળી દાબી દઉં,
ચાલશે ને ?
એ ગુલાબ સૂંઘી લઉં,
તારા અંબોડે ખોસી દઉં,
ચાલશે ને ?
અહીં બંધન સઘળા બઉ,
હવે ખુદને બંધાવા દઉં,
ચાલશે ને ?
આ લાગણી રહેવા દઉં,
ને ખુદને પામી લઉં,
ચાલશે ને ?