ચાલ મન

ચાલ, મન આજે એકાદું ગીત ગુનગુનાવી લઉં,

અવાજ રૂંધાય એ પહેલાં પ્રભુ ભજન ગાઈ લઉં,

માન-પાન ને પ્રતિષ્ઠા બધાની ક્યાં રે'વાની કાયમ માટે,

ઓછી થાય એ પહેલાં થોડું સત્કાર્ય તો કરી લઉં,

સત્તા પણ કાયમી ક્યાં રહેશે અમારી કે તમારી,

કોઈ ધક્કો મારે એ પહેલાં જ, હું માનભેર ત્યજી દઉં,

જવાબદારીનો બોજ ઉપાડી ક્યાં સુધી ફરવાનું,

પસ્તાવો કરવા કરતાં, ચાલને, બધું જાતે જ આટોપી લઉં,

ભવસાગરની માયાજાળ, ભૂલભુલામણી ભરેલી બહુ

મૃત્યુ આવે એ પહેલાં, સઘળી માયા જ તરછોડી દઉં.