ચાલ, જીવી લે

હે મન !

છોડ પરીક્ષા જીંદગીની.

મુક મથામણ મનોસ્થિતિની,

કર સ્વપ્નનું શ્રાધ વિધિવત.

લાગણીઓનું કરી દે તર્પણ.

એક જ તો છે રસ્તો અહીં

શ્વાસ અને ઉચ્છવાસ તણો,

સમજી લે એ ગણિત ધ્યાનથી.

ભારીભરખમ ત્યાગ દલીલો,

છાજિયે ચઢાવ તર્ક સઘળાં.

ખરેખર ના હોય જ્યારે જીવવા જેવું,

ત્યારે જ હોય છે જીવવાપણું.

સ્મરણોને ભરી બાથ,

વિષમ પરિસ્થિતિને

લગાવ દાવ પર.

સમયને તું લે મરોડી.

થોડા એનાં ઘાટ ઘડી લે.

હરહાલમાં માંડ તું જીવવા,

હે મન મારા તું !

દફનાવ દુ:ખને કોતરે,

ખુશીઓનો તું રાઝ શોધી લે.

થોડું થોડું કરી ચાલ જીવી લે !

ચાલ જીવી લે !