બાવરી રાધા

પ્રણયના ગાન ગાઈ, છૂપાઈ ગયો અટકચાળો

સંતાકૂકડી રમત રમતો છેલછબીલો છોગાળો !

આતુર નયનો જોવા તરસીને અકળાય

ગાજવીજ વર્ષા સાથે આજ વંટોળિયો વાય !

 બહુ રમાડી સંતાકૂકડી ને સાત તાળી

હવે જલ્દી આવીને દર્શન દે હે વનમાળી !

જોવાને આતૂર નયનોમાં, ઢળી જાય ઘનઘોરી સાંજ,

વાદળ વિખરાયા ને હવે જાગી રે આશ આજ !

મોરપીંછ, કાળી કામળી ને પીતાંબર ધારી

 મળવા આવી જા હવે ,નહિ ફાવશે કોઈ કારી,

ગોરસ ને ખાજા પીરસીને રસથાળી

પૂનમની રૂડી રાતે રમશું રંગતાળી !

 રમીને થઈ જશે ખુશ તારી આ રાધા રૂપાળી

 આવીને હવે ખેલ ખેલી જા ઓ વાંકા વનમાળી !