અણસાર
અણસાર
ફિતરત છે મારી એવી પ્રેમ પણ વાવાઝોડું થઈ વરસું છું,
વખત આવ્યે વરસવાનો છું કેવો એ અણસાર મોકલું છું !
ક્યાંક મળશે એ ધરા,જ્યાં વરસવા ધોધમાર હું તરસુ છું !
કમોસમી ભલે, માવઠું બની અમથો એ આસાર મોકલું છું.
ભીંજવ્યા પ્હેલાં ધરતી તને, હૈયાની ઊર્મિનું વ્હાલ મોકલું છું !
પછી ના કહેશો કે આવું છું એવો હું પૈગામ ક્યાં મોકલું છું ?
આમેય નિત્ય નીંદરે તમારી, સ્વપ્ન બની વિહરતો રહું છું,
આવતો જતો રહીને એમ આ હૃદયનો જ ભાવ મોકલું છું !
ક્યારેક તો રોકી જ લેશો એવા મનસુબા પંપાળ્યા કરું છું,
દિવાસ્વપ્ન કેરી દુનિયામાં રોજ અરજીઓ એમ મોકલું છું !
ઘાયલ છું હું ખુદ કે પછી કર્યા છે મેં તમને જ કાયલ મારા,
છે હાથવગું ઓસડિયું પ્રેમનું, એ સ્નેહની સારવાર મોકલું છું !
છેવટે તો છે મંઝિલ એક જ મારી ને તમારી આ સફરમાં,
પહોંચીશું સંગાથમાં એવી લાગણીનું આ વ્હાલ મોકલું છું !
ફિતરત છે મારી એવી પ્રેમ પણ વાવાઝોડું થઈ વરસુ છું,
વખત આવ્યે વરસવાનો છું કેવો એ અણસાર મોકલું છું !