તારા શમણાં

ક્યાં ખોવાઈ ગઈ તું હમણાં હમણાં,

નિશામાં પણ ન આવે તારા શમણાં !

સૂરજ ઊગે ન ઊગે, તું નિત રે ઊગતી,

પ્રેમ પ્રકાશ મુજ જીવને રે પાથરતી !

ક્યાં ખોવાઈ ગઈ તું હમણાં હમણાં..

ઉષા અજવાળે બની ઠની દર્શન દેતી,

મન મારૂં તુજ મૂરતમાં મોહિત કરતી !

ક્યાં ખોવાઈ ગઈ તું હમણાં હમણાં....

કોયલ ચહેકે એ પહેલાં તું ચહેકતી ને

મુજ ઉર ઉપવને મીઠો કલશોર કરતી !

ક્યાં ખોવાઈ ગઈ તું હમણાં હમણાં...

આજ નહીં તો કાલ આવશે દિલરાણી,

એ આશાએ ખુલ્લી રાખી છે ઉરબારી !

ક્યાં ખોવાઈ ગઈ તું હમણાં હમણાં...

ઝંખે તુને જોવા હૃદય બિચારુ વિરહી,

કાન્તાસુત નેણ ઝંખે દર્શન કાજે હે ! ગોરી !

ક્યાં ખોવાઈ ગઈ તું હમણાં હમણાં,

નિશામાં પણ ન આવે તારા શમણાં !