આવીશને તું ?

મઝધારે એકલી ઊભી રહી છું હું,

સાદ પાડું તો લેવા આવીશને મને તું ?

ક્યાં સુધી આમ વાટ નિરખતી રહીશ હું ?

વ્હાલનો વરસાદ લઈ પ્રેમથી પામી લે મને તું,

ભૂલી છું હું રસ્તા આપણા સ્નેહમિલનના,

પંથ બતાવીશ તો દોડતી આવી જઈશ હું,

અંધારે ઝબકીને પણ શોધીશ તને જ હું,

મનના સૂના આભમાં અજવાળાં કરીશને તું ?

હિલોળા લેતું હૈયું મારું સાગરના કિનારે,

સમી સાંજે વંટોળિયું બની આવીશને તું ?

થનગને છે દિલ મારું મઝધારે આવીને,

ક્ષિતિજની પેલે પાર મારી સુગંધને પારખી લેજે તું,

હલેસાં માર્યા આ અટવાયેલા વમળો વચ્ચે,

હાથ ધરીશ તો હસીને તારામાં સમાઈ જઈશ હું,

મઝધારે એકલી ઊભી રહી છું હું,

સાદ પાડું તો લેવા આવીશને મને તું ?