આ કેવી સ્વતંત્રતા ?

ચોતરફ છે દેશમાં ગુલામીની બેડી, એ સ્વતંત્રતા કેવી ?

સુઝે નહીં ઉપાય, ના દેખાય કોઈ કેડી, એ સ્વતંત્રતા કેવી ?

જાતપાતનાં ભેદભાવ છે આજે, માનવ રહ્યો છે લડી,

ભાઈચારો ખોવાયો, કઈ વાત એને નડી ? એ સ્વતંત્રતા કેવી ?

ખુરશીનો મોહ છૂટતો નથી, ધર્મને નામે સત્તા છે જડી,

ભ્રષ્ટાચારને લીધે પરિસ્થિતિ છે બગડી, એ સ્વતંત્રતા કેવી ?

મોંઘા થયાં છે મૂલ્યો ગાંધીજીનાં અહિંસક વિચારોના,

કોમવાદમાં આજે પ્રજા રહી છે ઝગડી, એ સ્વતંત્રતા કેવી ?

હે ઈશ્વર! ઉદ્ધારક બનજે, પ્રાર્થના કરીએ અમે સહુ એવી, 

નબળાં માનસમાં રહ્યાં છે સહુ સબડી, એ સ્વતંત્રતા કેવી ?