૧ થી ૧૦નાં જોડકણાં
૧ થી ૧૦નાં જોડકણાં
(૧)
પ્રારંભના ઢોલ વગાડે,
શૂન્યને દૂર ભગાડે;
સૌથી આગળ રહે છેક,
ગણતરીમાં પહેલો એક.
(૨)
એક સાથે એક મળે,
જોડી બનીને નીકળે;
હું હાથ ધરું, તું તાલી દે,
એક પછી તો આવે બે.
(૩)
બેની સાથે એક થાય,
એને ત્રિપુટી કહેવાય;
આગળનાં ડગલાં ગણ,
બે પછી તો આવે ત્રણ.
(૪)
ચાર રસ્તા ભેગા થાય,
એને ચોક કહેવાય;
જાણે તેઓ પાક્કા યાર,
ત્રણ પછી તો આવે ચાર.
(૫)
પાંચે પંચ બની જાય,
પંચ-પરમેશ્વર થાય;
સાંચને ન આવે આંચ,
ચાર પછી તો આવે પાંચ.
(૬)
વરસાદ આવે છત્રી લાવે,
કાદવ-કીચડ સાથે લાવે;
બેદરકાર રહેશો ન,
પાંચ પછી તો આવે છ.
(૭)
સાગર તો સાત ગણાય,
વળી સાત ઋષિ વખણાય;
સાતની છે બહોળી વાત,
છ પછી તો આવે સાત.
(૮)
આઠમે જન્મ્યા કાન,
કામથી બન્યા મહાન;
દુષ્ટોને ભણાવ્યો પાઠ,
સાત પછી તો આવે આઠ.
(૯)
રામની તો રામનવમી,
સારી વાતો બધી ગમી;
બુરાઈનો દૂર થાય પગરવ,
આઠ પછી તો આવે નવ.
(૧૦)
દસમે વિજયાદસમી,
સારા સામે બુરાઈ નમી;
શીખવામાં ન થાવ ટસમસ,
એકડે મીંડે થાય દસ.