వచ్చి వెళ్ళి పోకు

ఇదిగో వచ్చి అంతలోనే వెళ్ళిపోతాను అనకు

వసంతకాలం వచ్చి క్షణాలేగా అవుతున్నాయి  

గాలి పరిమళం మారి మది పులకరించబోయె

ఊపిరి ఉల్లాసమెక్కి మత్తుకళ్ళే అరమోడ్పాయె 

నేనేం చెప్పనైనా లేదు నువ్వేం విననైనాలేదు  

అంతలోనే సద్దుమణగనీయక చల్లగా జారిపోకు!

తారలింకా నీతో ఊసులాడనేలేదు వెళతాననకు

వస్తున్న చంద్రుడేమో నిన్నుచూసి చిన్నబోయి

మన్మధుడ్ని కోప్పడగా ఓరగా రతి నిన్నుగాంచె 

వలపురాగిణులు వయ్యారంగా నిన్ను చుంబించె

నేనది చూసి ఈర్ష్యపడి కౌగిట్లో కట్టిపడేయనేలేదు  

అంతలోనే చలించి మతి మారెనని మాయమవకు!

తీరని దాహం తీర్చక అలజడికి ఆస్కారమివ్వకు

మనసులు రెండూ ముడిపడి పరిభ్రమిస్తున్నాయి

ప్రణయమేను పరిపక్వతతో నాట్యమాడ పురివిప్పె

అదిచూసి నింగి నేలను రమ్మని రాయబారమంపె

రసికత రంగులు ఇంకా పూర్తిగా పులుముకోలేదు   

అంతలోనే అలిగి ఆగలేక వంకలు వెతికి వెళ్ళిపోకు!