నీ కోసం గాక

నీకోసం గాక ఏమి..పాడలేను వ్రాయలేను..! 
తలనిమిరే నీ చేయిని..చూడలేను చూపలేను..! 

నా లోపలి నీవేమో..వేషాలకు అతీతమే.. 
మదివేదన కాల్చకనే..నిలువలేను పంచలేను..! 

ఈ మాటల గారడితో..మాయచేయు పనేముంది.. 
ఎవ్వరినో మార్చాలని..తలచలేను కోరలేను..! 

అందరు నా ప్రతినిధులే..చక్కని ప్రతిబింబాలే.. 
ఈ సినిమా నాదేలే..మరువలేను మరగలేను..! 

మట్టిచాటు రంగులన్ని..వెలికితీయు గాలిలీల.. 
ధారలయే వెలుగుతేనె..దాచలేను ఆపలేను..! 

అర్థంపర్థం లేనిది..కాదీ బ్రతుకని తెలిసెను.. 
జన్మగుట్టు పట్టుకోగ..చెప్పలేను నేర్పలేను..!