చెప్పనెవరికి

'చిత్తు'ప్రతిగ ఎన్నిసార్లొ..పుట్టానని చెప్పనెవరికి..!? 
నీచుట్టూ తిరుగుటలో..పోయానని చెప్పనెవరికి..!? 

నాకు-నేను గిరిగీసుకు..దాటలేని యాతనలో.. 
నా చుట్టూనే తిరుగుట..మానానని చెప్పనెవరికి..!? 

తేడాలను తెలుసుకునే..దిద్దుకునే ప్రక్రియలో.. 
'నీ-నా'లను మనసారా..కాల్చానని చెప్పనెవరికి..!? 

వేరేగా ఉన్నదెవరొ..బోధపడిన నేనెక్కడ.. 
బంగారపు వెన్నెలలో..ఆగానని చెప్పనెవరికి..!? 

మాటలెంత పేలవమో..పేలకనే పేలేనవి.. 
చల్లబడే పేలాలను..ఆపానని చెప్పనెవరికి..!? 

కర్మచక్ర బంధాలను..రాల్చుకునే వేడుకలో.. 
సుదరిశన చక్రమునే..పట్టానని చెప్పనెవరికి..!?