వారెవ్వరు

నీటిబొట్టు విలువ సరిగ..తెలుసుకున్న వారెవ్వరు..!?

దు:ఖమనే అగ్నిజలధి..ఆర్పుకున్న వారెవ్వరు..!?

హృదయమేగ నిజపూజా..మందిరమా ఇంకెక్కడ.. 

దైవకోటి లోలోపల..చూసుకున్న వారెవ్వరు..!?

అందమైన లోకంలో..వెదికేరా స్వర్గమేదొ.. 

కులమతాల నరకాలను..కాల్చుకున్న వారెవ్వరు..!? 

చెలిమివనము మది విరియక..కలిగేనా సమభావన..

ఆనందపు బాష్పనిధిని..అందుకున్న వారెవ్వరు..!? 

సంతసాల మధుశాలయె..మనసు కదా గమనిస్తే.. 

ఆందోళనలన్ని వదిలి..ఊరుకున్న వారెవ్వరు..!?