కదిలే పరవశం

ప౹౹

కదిలే పరవశమా కలలోనూ తన్మయమే

మదిలో దాగిన మార్మికతకూ చిన్మయమే ౹2౹

చ౹౹

ఊహలే ఊపిరై ఉద్భవించి ఊసుపోనీదే  

దాహాలే పెంచి దారి తెన్నునే కనపడనీదే ౹2౹

గూటిలోని చిలకమ్మ గుండెలోనే నిలిచినే

ఏటిలోని సుడి ఎదను చేరి బాగ అలసినే ౹ప౹

చ౹౹

గొంతులోని తీయని రాగం తీగలుగా సాగి

చెంతలేని చెలియ కోసమే తపించినే ఊగి ౹2౹

కనులెంత వేచినో కన్నార్పని స్థితికే ఎరుక

తనువెంత తల్లడిల్లెనో చెప్ప లేక ఆ కోరిక ౹ప౹

చ౹౹

ఊగిసలాడే మానసానికి ఉత్ప్రేరకం లేదా

సాగిలపడే సరసానికి సమయం కుదరదా ౹2౹

అనుకున్నదే జరిగేనని ఆశించుట తప్పేనా

కోరుకున్నదే కొరవడిన కృశించుట ఒప్పేనా ౹ప౹