వలపు దాహం

ప౹౹

ఎన్ని దారులనో నడవాలి ఎడారిని దాటేందుకు

కొన్ని కలలైన కనాలి ఎదనే ప్రేమగ మీటేందుకు|2|

చ||

రేపు కూడా నిన్నేలే ఎంచిచూసిన ఆ ఎల్లుండికి

ప్రేమలో తావు లేదులే ఎన్నడూ మరి మొండికి|2|

వాయిదాలు చెప్పక వచ్చి నిలుపు నీ మర్యాదే

ఖాయిలాలేని వలపే నీదని తొలగించు ఫిర్యాదే|ప|

చ||

వలపు గుర్రం ఎక్కాకను తానలపునే ఎరుగునే 

తలపు స్వర్గం తలుపు తొలగి మైకం పెరుగునే|2|

ఎన్నాళ్ళీ ఈ తీయని బాధ తీర్చగా నీవు రావా

కన్నీళ్ళే కనపడని మదనమే ముదమునే తేవా|ప|

చ||

మనసులో యోచనే ప్రేమ యాచన మరి కోరద

వయసుతో పెరిగే ఆ కోరికేదో ఇప్పుడైనా తీరద|2|

వేసారిన మదిలో ఎండమావిని ఇక తొలగించు

కాసారంతో ఎదలు కలుప జాగేలనో కౌగలించు|ప|

చ౹౹

సహనం దాటినదా ఇక మిగిలేది నా అహమేగా

అసహనం తోటి కోల్పోయిది వలపు దాహమేగా ౹2౹

వచ్చి వలపు సేద్యమే చేసి ఎదలో పండించవా

నచ్చి నవపారిజాతమై నాఅహం తొలగించవా ౹ప౹