గురి

ప౹౹

గురి చేరాలంటే నలుగురి తోడ్పాటూ కావాలి

చెరిసగం ఒకటవ్వాలన్న కోరికే కదలి రావాలి ౹2౹

చ౹౹

కాలమంతా కలలతోనే గడిచిపోయే ఓరన్నా 

కలిసుండే అవకాశమూ కలిగేనా ఈసారన్నా ౹2౹

గజిబిజి ఆలోచనలేలా ఉన్నా గందరగోళంతో

జిగిజిగి ఎద జిందగీ కలిసెలే వలపు మేళంతో౹ప౹

చ౹౹

చెమరించిన కన్నులలో చెలిమిని చూడలేవా 

పొటమరించిన పైయ్యెదలో ప్రేమనే కానలేవా ౹2౹

వయసుతోపాటు వలదన్న వచ్చేసెలే వరవడి

సొగసుతో శోభాయమానమై తీర్చు త్వరపడి ౹ప౹

చ౹౹

నడచి వచ్చిన నమ్మకాన్ని నీదరికే చేర్చుకోవా 

గడచి పోయిన కాలాన్ని గణించక మర్చిపోవా ౹2౹

ఒకరికి ఒకరంటూ ఒదిగిపోవా ఎదలోనికంతా

వేరొకరు వేలెత్తని ఎలమి చూపు లోకానికంతా ౹ప౹