ఎలమి వరద

ప౹౹

ఎక్కడిదో ఆ అందం మనసుకే గాలం వేసింది

అక్కడినే బంధం కలపాలని మదినే చూసింది ౹2౹

చ౹౹

నిద్రలేని రాత్రులనూ తనకే అంకితం చెయాలి  

భద్రమైన ప్రేమతోనే అందానికి ముడి వేయాలి ౹2౹

నిశీరాత్రులే కసీకళ్ళు నిలువునా గుచ్చేస్తున్నాయి

వశీకరణాలే వలపు తెమ్మరలో ముంచేస్తున్నాయి ౹ప౹

చ౹౹

ఏమిటో ఎలానో చేస్తున్నానే ఏమేమో తెలియక 

ప్రేమతో పెరిగిన మోహము కావాలంది కలయిక ౹2౹

నింగిలోని చుక్కలు నిండిన వెలుగే యిస్తున్నాయి

పొంగిన ఎలమి చుక్కలే ఎదను వెక్కిరిస్తున్నాయి ౹ప౹

చ౹౹

ఆ నిషా కనులూ నిగ్రహా నిర్మూలనకే ఒడిగట్టాయి 

తానిషా ఫర్మానాలా మరీ తనువుతో పగపట్టాయి ౹2౹

నిముషమే గంటలా గడుస్తూ గమనమే లేకున్నది

విషయమే తేలక ఎదురు చూపుల పని కాకున్నది ౹ప౹

చ౹౹

ఏ మేఘమో వచ్చి సందేశాన్ని చెలియకు చేర్చదా  

ఒక రాగమైన రావించేసి అనురాగమూ కూర్చదా ౹2౹

ఎంతకాలమో ఎదురు చూడక తప్పదా ఎడదలో

అంతకాలమే ఆగలేనే ఎగసిపడే ఎలమి వరదలో ౹ప౹