"స్వతంత్ర భారతం..!"
"స్వతంత్ర భారతం..!"
ఇన్నేళ్ల ఈ స్వతంత్ర భారతంలో ...
ఆకలి తీర్చే రైతు కంట్లో కన్నీరు !
దోచేసే నాయకుడు నోట్లో పన్నీరు !!
కాలిన కడుపులతో అనాధ పిల్లల ఆకలి చావులు !
కడుపు నిండినా తీరని కుబేరుల ఆకలి దప్పికలు !!
ఇన్నేళ్ల ఈ స్వతంత్ర భారతంలో ...
అంతరిక్షం దాటి పెడుతున్న పరుగులు !
దారిద్ర్య రేఖ దిగువకి పడుతున్న బ్రతుకులు !!
విగ్రహాలకు కోట్లు ఖర్చు పెడుతూ ఆర్భాటాలు !
నిరుపేదలపై పన్నుల భారం మోపుతూ ఆంక్షలు !!
ఇన్నేళ్ల ఈ స్వతంత్ర భారతంలో ...
స్వదేశాల్లో ఉచిత చదువులకై పోరాటాలు !
విదేశాల్లో ఉన్నత కొలువులకై ఆరాటాలు !!
నేరస్థులకు దాసోహమంటున్న రాజ్యాధికారాలు !
బాధితులకు శాపంగా మారిన న్యాయచట్టాలు !!
ఇన్నేళ్ల ఈ స్వతంత్ర భారతంలో ...
కులాల కుంపట్లు రేపుతున్న కార్చిచ్చులు !
మతాల మధ్య రగులుతున్న విద్వేషాలు !!
వర్ణాల వివక్షతో కొట్టుకుంటున్న జనులు !
వేర్పాటు వాదంతో వీగిపోతున్న ప్రాంతాలు !!
ఇన్నేళ్ల ఈ స్వతంత్ర భారతంలో ...
రూపాయి కోసం ప్రాకులాడుతున్న నిరుపేదలు !
రుణాలు ఎగ్గొట్టి పారిపోతున్న పారిశ్రామికులు !!
మామూలుగా పనిచేయని రాజకీయ నాయకులు !
మామూళ్ళతోనే పనిచేస్తున్న ప్రభుత్వ కార్యాలయాలు !!
ఇన్నేళ్ల ఈ స్వతంత్ర భారతంలో ...
నడి వీధిలో ఆడపడుచు చీర లాగే కౌరవులు !
ఎదిరించి నిలదీయలేని నిస్సహాయ పాండవులు !!
అపరాధులకు అండగా నిలిచే రాజకీయ పలుకుబడులు !
ప్రాణత్యాగం చేసే దేశ సైనికులకు కనీస వసతులు కరువు !!
ఇన్నేళ్ల ఈ స్వతంత్ర భారతంలో ...
ఓటుకి నోటుతో ప్రజాస్వామ్యానికి పడుతున్న బీటలు !
వారసత్వపు రాజకీయాలకు పరుస్తున్న పీటలు !!
జాతియ జెండాకు తరుగుతున్న ఆదరణలు !
రాజకీయ జెండాలకు పెరుగుతున్న మర్యాదలు !!
ఇన్నేళ్ల ఈ స్వతంత్ర భారతంలో ...
నోరున్న పండితులు నీతులు చెప్తే తిడతారు !
నోటున్న ప్రముఖులు బూతులు తిడితే పడతారు !!
పెన్ను ఎక్కుపెట్టే పాత్రికేయులకు బెదిరింపులు !
గన్ను గురిపెట్టే హంతకులకు గుర్తింపులు !!
ఇన్నేళ్ల ఈ స్వతంత్ర భారతంలో ...
పేరుకే ప్రజాస్వామ్య దేశం !
లోలోపల మాత్రం నాయకత్వ విద్వేషం !!
పైకి సైతం భిన్నత్వంలో ఏకత్వం !
లోపించిన సౌభ్రాతృత్వంలో సమానత్వం !!
ఇన్నేళ్ల ఈ స్వతంత్ర భారతంలో ... !
"ఒక చెంప పై కొడితే ఇంకో చెంప చూపించు !"
అన్న మహాత్మా గాంధీ చూపిన సత్యా అహింస ద్వారాన్ని మూసేసాం !
"మనుషులను చంపగలరేమో కానీ, వారి ఆలోచనను చంపలేరు !"
అన్న భగత్ సింగ్ ఆలోచనను చులకన చేసి చంపేశాం !
"మేల్కోండి.. చదువుకోండి.. సమాజం కట్టుబాట్లను దాటి స్వేచ్ఛను సాధించండి !"
అన్న సావిత్రీబాయి పూలే పిలుపును పంజరంలో బంధించేసాం!
"దేశం కోసం చావడానికి సాహసం చేయ్యకపోతే.. దేశంలో బ్రతికే హక్కు ఎక్కడిది?"
అన్న నేతాజీ చంద్ర బోస్ ప్రశ్నకు సమాధానం చెప్పలేక చతికిల పడ్డాం !
"స్వరాజ్యం నా జన్మ హక్కు, దాన్ని నేను సాధించి తీరుతాను !"
అన్న తిలక్ కలం నుండి జాలువారిన అక్షరాలను కాల రాసేశాం !
"ఆడదంటే అబల కాదని, ఆంగ్లేయుల గుండెల్లో రైళ్లు పరిగెత్తించిన !" వీరనారి ఝాన్సీ లక్ష్మీబాయి పోరాటాన్ని పక్కకు నెట్టేశాం !
"ప్రజలంతా ఒక్క తాటి పైకి వస్తె, ఏ ప్రభుత్వమూ పనిచేయదు !"
అన్న ఉక్కు మనిషి సర్దార్ వల్లభాయ్ పటేల్ మాటలను పాతి పెట్టేశాం !
ఇంకా ఎందరో స్వాతంత్య్ర సమరయోధుల ప్రాణ త్యాగాలకు, వారి సిద్ధాంతాలకు నిర్మొహమాటంగా గండి కొట్టేశాం !
ఇదేనా ఇన్నేళ్ల నా ఈ స్వతంత్ర భారతం ?
- mr.satya's_writings ✍️✍️✍️