స్వాగతవచనం

మంచు పూలు పూసినట్టు డిసెంబర్

హేమంతవెలుగులలో సంబరాలు జరుపుకుంటోంది

చలిపులిని నడుముకు చుట్టుకుని అయ్యప్ప మాలధారుల బృందం

ఏకాగ్రతే మార్గమై సాగుతోంది

కాలబిలపు గుహలో జారిపోతూ 2019

జ్ఞాపకాల అంచుపై నడిచి పోతోంది

నడకమంచిదే అంటూ

వరించే అనుభూతులను ధరించాలని

కుతూహలం కొలతలతో లెక్కిస్తుంటావు

వేధించే అనుభవాలను చుట్టచుట్టి మనసుపొరల్లోకి తోసేస్తావు

నడక అడుగేయటమేకాదు దారితప్పిన నడతను

త్రాసులోని సూచీముల్లులా సవరించే దిక్సూచికూడా

ఐక్యతా సూత్రంలా సవరణలు వివరణల తరాజుతో

సమన్వయం చేస్తుంటుంది

ఉదయపు క్రతువులా నడక నిరాశానిస్ప్రహలను

ఆహుతిస్తుంటుంటే

స్వాగతవచనమై అడుగు పలకరిస్తుంటుంది