స్నేహానికి విలువ

స్నేహమే శాశ్వతం అని

ఇప్పుడిక చెప్పలేను

మనకెదురయ్యే అనుభవాలు

అభిప్రాయాల్ని మార్చొచ్చు

ఎదుగుదలను బట్టి

దినచర్య మారొచ్చు

కానీ జ్ఞానాన్ని బట్టి

స్నేహితుల్ని మార్చేయగలమా

ఎక్కువ తక్కువ స్థాయిని చూసి

నే నిన్ను పలకరించలేదే

అస్థిత్వం కోల్పోవడంలో

ఒక మజా ఉంది

ఎప్పటికీ ఉంటుంది కూడా

కానీ 

ఎప్పటికీ నిరర్థకంగా ఉండిపోవడం

నీతో స్నేహానికి ఆధారం అయితే

అలాంటి బంధాన్ని నే కోరుకోను

స్నేహానికి మారకపు విలువను

నేనైతే నిర్ణయించలేను 

దూరంగా ఉండి

సొంత నీడలో సేదదీరతాను

మూర్ఖత్వానికి చిరునామాగా ఉన్న నేను

ఇంకెప్పుడూ నీకు కనిపించను