సముద్రపు కెరటాలు
సముద్రపు కెరటాలు
ఒక పౌర్ణమి రోజున కలిశాము
ఏదో తెలీని అనుభూతి
తెలిసే లోపే నీ చిరునవ్వుకు నన్ను బానిసను చేసింది
నీ గురించి ఇంకా తెలుసుకునే కొద్దీ
నాలో ప్రశ్నలు పెంచింది
ఒక అమావాస్య రోజున విడిపోయాము
ఇంకేదీ తెలుసుకోకూడదు అని నిశ్చయంగా అనిపించింది
తెలుసుకున్న విషయాలకు పశ్చాత్తాపం పడాలనిపించింది
నా గురించి నాకేమీ తెలియదని
ఆ చీకటి రాత్రి వెక్కిరించింది
ఎన్నో పౌర్ణమి దినాలు
అన్నే అమావాస్య రాత్రులు
అలా జారుకుంటూ వెళ్లిపోయాయి
నేను సముద్రపు కెరటాల్ని చూస్తూ ఉండగానే
వయసు వార్థక్యాన్ని కౌగిలించుకుంది
ఆ పున్నమి అమావాస్య ఈడి బతుకును తినేశాయి
అనే పదాలు నా చెవుల్లో గింగురుమంటున్నాయి..