శిశిరపు పరువం

ఆకులు రాల్చు కాలం 

యవ్వనపు ఆశలు కాలం చేస్తాయా

లేక అంట కాగిన మసిలా అంటుకునే ఉంటాయా 

ప్రతి శిశిరం ఇదే ప్రశ్న

తినబోతూ రుచెందుకు అనే సమాధానం

ఆకులు రాలినా

వసంతం మళ్లీ వస్తుందనే నమ్మకమా చెట్లది

మనిషికలా అవకాశం ఉందా

ఉంటే ఆత్మ దేహాన్ని వదలడం శిశిరమా

మళ్లీ వసంతం లాంటి జన్మను కోరుకోవడం మూర్ఖత్వమా

ఏమో

శిశిరం ఎన్ని ప్రశ్నలు గుర్తుకు తెస్తుందో

లోకం వీడినా

మన స్మృతులను శాసించే వారినీ

మనమూ ఒకానొక కాలానికి

స్మృతులుగా మిగులుతామని

ఏదో శృతిలో

రాలే ఆకుల శబ్దంలో

శిశిరపు పరువం

ఎన్ని చెబుతుందో

మళ్లీ వసంతం తెస్తానని భ్రమను ఇచ్చి

ఎక్కడికో వెళ్ళిపోతుంది..