రాజ్యం

గెలుపొందిన సంపద మూటలు

దాసీల ఆర్తనాదాలు

అతిశయం గొలిపే మృత దేహాలు

వాటి నుండి ప్రవహించే రక్తపు వాగులు

సంపద నశించింది

దాసీలు మరణించారు

మృత దేహాలు భూమిలో కలిశాయి

రక్తపు చారల మీద

సంబరాలతో కొత్త ముగ్గులు కనిపించాయి

రాజు తరలి వస్తున్నాడు

రాజ కుటుంబంలోని వారంతా వస్తున్నారు

ఉన్నట్టుండి ఏదో అలజడి

రాజు కళ్లకు చుట్టూ రక్తమే కనిపించింది

బానిసల తొడల నుంచి చిట్లి

మొహం మీద నుంచి పెల్లుబికి

మోకాలి గాయాలను సలుపుతూ

అవే రక్తపు చారలు

ఓ చిన్న పిల్ల ముగ్గు వేస్తోంది

ఆ ముగ్గుల గీతలు

ధర్మాన్ని ప్రశ్నించే రాతలు

రథం మీద నుంచి దూకి పారిపోవాలనిపించింది 

రాజుకు శ్వాస కష్టమైంది

రాచ పీనగ ఒకటే పోకూడదనేమో

ఆ రథం

ముగ్గు వేసే పిల్లను కూడా చక్రాల కింద నలిపేసింది

ఆయువు తీరినా

రక్త కాంక్ష తీరని రాజుకు

మరో రక్తపు చారిక అంటుకుంది