పూవులు - దారం
పూవులు - దారం
ఆరోజు బస్టాపులో నందివర్దనాలు
వాటి వెనుక దాక్కున్న నేను
పిల్లి కళ్ళు మూసుకుని పాలు తాగినట్లు
నువ్వు నన్ను చూడలేదనుకున్నా
తరువాత డేరా పూలు
వాటి తర్వాత మందారాలు
చాలా సార్లు పూలకొట్లోంచి చూశాను
నిన్ను చూస్తూ పూల మాలలు కట్టాను
నువ్వు నన్ను చూడకూడదు
నేను నిన్ను రోజూ చూడాలి
అంతే
ఎందుకని అడక్కూడదు
అలాగని నువ్వు బస్టాప్ కి రాకుండా మానేస్తావేమో
ఆపని మాత్రం చెయ్యకు
ఎందుకిదంతా అని అడక్కు
నాకూ తెలీదు
అయినా పూలని కలిపి దండ చేస్తాం
వాటి సువాసన కాస్త దారానికి కూడా ఇచ్చేస్తాయి పూలు
దారం ఎందుకని అడుగుతుందా చెప్పు
లేదు కదా
అంతే మనం కూడా
నీ సువాసన నన్ను అల్లుకుంటే చాలు
నీ నవ్వులు కాసిన్ని జేబులో వేసుకుంటే చాలు