పుట్టిన రోజు

నీ పెదవుల తడి

నను తాకిన క్షణం

నీ కురులు నను కమ్మిన నిమిషం

మన్మథుని పరీక్షల కాలం

మరో పుట్టిన రోజు

పెసరట్టు మీద 

తనను తాను పరుచుకుంటూ

వగలు పోతున్న ఉప్మా

నా ప్లేటును చేరిన క్షణం

మరో రుచి పుట్టిన రోజు

కాలికి అంటిన పుప్పొడి

మరో పూవుల వనానికి అంకురార్పణగా

సీతాకోకచిలుకను చూసినప్పుడు

మరో సృష్టి కోణపు పుట్టిన రోజు

ఓ కొత్త రకం జోక్ విన్నా

మరో భాషలో పాట విన్నా

కలిగిన కొత్త ఫీలింగ్స్ పుట్టిన రోజు

వీధి చివర బిచ్చగత్తె

భిక్ష పొంది చూసిన చూపు

మానవత్వానికి కొత్త పుట్టిన రోజు 

విడువనని బాస చేసి

విరిచిన మనసుతో నను వదిలిన రోజు

నీలోని గొప్ప నటునికి పుట్టిన రోజు

రోజూ 

క్షణమూ

ఒక పుట్టిన రోజు