ప్రేమికుడు - తుఫాను

మనసంతా ఏదో గందరగోళం

వాయుగుండం అంట

సముద్రం లుంగలు చుట్టుకుంటోంది

ఆమె జడ కొప్పులానే అది అర్థం కాకుండా ఉంది

నావలన్నీ తీరానికి వస్తున్నాయి

అతని అనుమానాల చిట్టాలాగా

ఇసుక రేణువులు లెక్కపెడుతూ కూర్చున్నాడు

ఒకటీ రెండూ అలా

ఆకాశం నల్లని ముసుగు కప్పుకుంది

ఇంక వెళ్ళిపో అన్నట్టు గాలి మూలిగింది

అతడు కదల్లేదు

మొండితనం 

కాదు ప్రేమ

ఆమె అంటే పిచ్చి

సముద్రం పొంగింది 

పొంగుతూ చీలింది

అదిగో అక్కడ ఓ కొండ మీద

సాగర కన్య 

నిజంగా సాగర కన్యే

తననే పిలుస్తోంది

అచ్చం కథల్లోలాగా

అతను వెర్రిగా నవ్వుతూ ముందుకు వెళ్లాడు

ఇంకా ముందుకు వెళ్ళాడు

సాగరమే ఉంది ఇంకేమీ లేదు

కానీ అతనికి తిరిగి వెళ్లాలని లేదు

ఏదో సాధించిన తృప్తి

కాస్సేపటికి తుఫాను తీరం దాటింది.