ప్రేమ పాఠం

మనసువిప్పి చూపించే..అద్దమొకటి దొరికేనా..!

ప్రేమపాఠ మందించే..హృదయమొకటి దొరికేనా..!

మాట్లాడే తప్పనిసరి..గ్రహించుటే శాంతిప్రదం.. 

సౌఖ్యమేదొ పండించే..మార్గమొకటి దొరికేనా..! 

కణకణమున వేనవేల..మధుశాలలు ఉన్నవోయి.. 

కరుణమీర ఒలికించే..కలశమొకటి దొరికేనా..! 

చెలికన్నుల అనురాగం..నిజ'శార్వరి' సంగీతం.. 

విశేషముగ వినిపించే..రాగమొకటి దొరికేనా..! 

వియోగమను వనములోన..విహారమే రసయోగం.. 

ఈ 'నేను'ను మరపించే..తత్వమొకటి దొరికేనా..!