ఒక రహస్యం

ఏదో పాత సినిమాలోలా

అతను గుహ లోపలికి వెళ్ళాడు

అంధకారం అగ్గిపుల్ల వెలుతురును కమ్మేసింది

టార్చ్ లైట్ బ్యాటరీ అయిపోయింది

తచ్చాడుతూ తిరుగుతూ

గుహ నుండి వెనక్కి రావాలని నడిచాడు

రాళ్లు అడ్డుగా ఉన్నాయని కన్నీరు కార్చాడు

బయట నుంచి నవ్వులు

నవ్వుల వెనుక నిజాల మెరుపులు

చేతికందిన రాయితో గుహ గోడను కొట్టాడు

నవ్వులు ఆగాయి

కొద్దిగా వెలుతురు వచ్చింది

ఏదో ప్రతిబింబం

అక్కడక్కడే ఉంది

తనలాంటి మనిషే

ఎవరో అటు వైపు ఉన్నారు

అరిచాడు

చేతులు ఊపి సైగ చేశాడు

ఒక్కో రాయి పగులగొడుతూ 

అటు వైపుకు వెళ్ళాడు

అక్కడ ఏదో గెలిచిన ఫీలింగ్ కలిగింది

ఎవరూ లేకున్నా ఏదో భ్రమ తొలగింది

మళ్లీ గుహలోకి వచ్చాడు

ఇక బయటికి వెళ్ళాలని అనిపించలేదు

తనలో ఉన్న మరో వ్యక్తి

ఇక ఎన్నడూ కనిపించడు 

రహస్యం పాతిపెట్టిన తరువాత

అతను నవ్వుకున్నాడు 

వెలుపలి ద్వారం కనిపించింది

నడుస్తూ బయటికి వచ్చాడు