నేటి భారతం

నా భారతదేశం...

అనేక సంస్కృతులకు, సంప్రదాయాలకు పుట్టినిల్లు !

ఎందరో రాజులను, కవులను, ఋషులను, సంఘసంస్కర్తలను, స్వాతంత్ర్య సమరయోధులను, శాస్త్రవేత్తలను ఈ ప్రపంచానికి పరిచయం చేసింది.

అంతేనా ?

అనేక ఔషధాలు, విజ్ఞానాన్ని, నాగరికతలను ఈ ప్రపంచానికి అందించింది.

వీటన్నింటినీ తన పొత్తి కడుపులో పదిలంగా దాచుకుని ప్రపంచ చరిత్ర పుటల్లో తనకంటూ ఒక ప్రత్యేక అధ్యాయాన్ని లిఖించుకున్న నా ఈ భారతావని ...

మన తాతల కాలం నుండి ఇంకా అభివృద్ధి చెందుతూనే ఉన్న దేశంగా మిగిలిపోవడానికి గల కారణాలు ...

నా ఈ "నేటి భారతం !" అనే కవితా ద్వారా....

రైతుల కన్నీటితో తడిచిన పంట సేద్యాలను,

కార్మికుల స్వేదాలతో నిర్మించిన దేశభ్యున్నతినే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

విస్మరించిన సైనికుల పోరాటాలను

గతించిన సమర యోధుల త్యాగాల ఫలితాలనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

విధేయత లోపించిన విద్యార్థులతో

గౌరవం పొందని గురువులనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

సంస్కారం కోల్పోయిన సంతానంతో

పున్నామ నరకానికి పయనమైన తల్లిదండ్రులనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

కులాల కుంపట్లు రేపే కార్చిచ్చులను,

మతాల మధ్య రగిలే విద్వేషాలనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

వర్ణాల వివక్షతో మెలిగే జనులను,

ప్రాంతాల వేర్పాటుతో జరిగే ప్రజలనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

లంచాలు మరిగే ప్రభుత్వ కార్యాలయాలను,

అంచెలుగా ఎదిగే రాజకీయ నాయకులనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

బలవంతుడిని బలంగా తీర్చే రాజ్యాంగలను

Advertisement

బలహీనుడిని బానిసలా మార్చే చట్టాలనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

రామబాణం నిలువరించలేని అన్యాయాలను

గీతోపదేశం నియంత్రించలేని అఘాయిత్యాలనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

బట్టలు ఊడుతున్న మగువలను

నెత్తురు పారుతున్న రహదారులనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

రూపాయి కోసం ప్రాకులాడే నిరుపేదలను,

రుణాలు ఎగ్గొట్టి పారిపోయే పారిశ్రామికులనే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

నాయకత్వపు లేత మొగ్గలపై

పేరుకుపోయిన రాజకీయమనే రొచ్చును

స్వార్థమనే ఉచ్చులో కూరుకుపోయిన

సేవా భావపు గుణాన్నే

నిన్నటి స్వేచ్చా స్వతంత్రమందామా ?

రేపటి భావీ భారతమందామా ??

దేశమంటే మట్టి కాదోయ్, దేశమంటే మనుషులోయ్ అన్న గురజాడ వాక్యానికి ఐక్యతేది ?

బానిసత్వాన్ని పోగొట్టుకోవాలని పిలుపునిచ్చిన అంబేద్కర్ ఆశయాలకు విలువేది ?

స్వరాజ్యం నా జన్మహక్కు అని చాటి చెప్పిన తిలక్ పదాలకు అర్ధమేది ?

దేశం కోసం చావడానికి సాహసం చేయకపోతే దేశంలో బ్రతికే హక్కు ఎక్కడిది ? అన్న నేతాజీ మాటలు గుర్తున్నాయా ?

ఇకనైనా మేలుకో...

ఓ భారతీయుడా ?

లే...

లే...

ఐక్యతనే పిడికిలితో బద్దలు కొట్టు కులపు గోడలను

సమైక్యతనే అగ్గితో కడిగేసేయ్ మతమనే చిత్తు కాగితాన్ని

పాలిస్తేనే పాలకుడంటే ఎలా ?

నడిపిస్తేనే నాయకుడవుతాడని గుర్తుపెట్టుకో.. !

మట్టి మట్టి ఏర్పడితే దేశం కాదోయ్,

మనిషి మనిషి కలిస్తేనే దేశమన్న విషయాన్ని మరిచిపోకోయ్...!!

-mr.satya's_writings