మనసాగదు

ఆగిపోయె రేయి సఖా..నీవురాక తెలవారదు..! 
అమావాస్య మాటాడదు..నీవొస్తే మనసాగదు..! 

పిలువలేను నీ పేరును..గాలి మోసుకెళ్ళునెటో.. 
మోసమేమి జరిగేనో..క్షణమైనా కనుమలగదు..! 

హాయి ఎలా ఉంటుందో..గుండె కాస్త ఆగినంత.. 
ఈ మౌనం తియ్యనిదే..ఎంతకూ తలుపు తియ్యదు..! 

ప్రేమకెంత నిదానమో..లోలోపల వెన్నెలలా.. 
గొంతుదాటి ఒకపాటగ..పాడుకోగ అరె లొంగదు..! 

ఈ వసంత మాధురినే..మోయలేను కలనైనా.. 
నా లోపలి జాతరను..చూపుటెలానో తెలియదు..! 

జ్ఞాపకాల చేమంతుల..వానకన్న మాయేదో.. 
యాగమేదొ జరుగుతోంది..రససిద్ధికి తెఱదించదు..!