కలా! దూరంగా పో..

నువ్వు బాగుంటావ్

నీ కోసం చేసే ప్రయత్నం కష్టమే

కానీ చాలా ఇష్టంగా ఉంటుంది

నువ్వు పూర్తయితే ఇంకా బాగుంటావ్

లేకుంటే

దుప్పట్లో దూరిన దోమలా కుడుతూ

నన్ను నిద్రపోనీవు

చల్లగాలికి సలిపే గాయంలా 

స్థిమితంగా ఉండనీవు

అందుకే నువ్వంటే నాకు భయం

నిద్రలో నువ్వొస్తే గబుక్కున లేచి కూర్చుంటాను

పాత పాటలు పాడుకుంటూ

చిరిగిన ఆత్మవిశ్వాస వస్త్రాన్ని కుట్టుకోవడానికి

సూదీ దారం వెతుక్కుంటాను

ఇక చాల్లే

నాకిక ఓపిక లేదు

నువ్వు రాకు

పో 

దూరంగా పో

అందమైన జీవమున్న ఓ కలా!

నన్నంటకు 

నీ దిక్కున్న చోటికి పో