జడుసుకున్నా
జడుసుకున్నా
పాత ఇనుమును పట్టుకున్న తుప్పులా
పాత్రలకు పట్టిన మకిలిలా
నేను నీ ఆలోచనల్లో పడి
పడ్డచోటే ఉండిపోతానేమో అని భయం
మనిషిలో దేవుణ్ణి
దేవుడిలో మనిషిని
పరాకులో పరమార్థాన్ని
ఇలా అన్నీ చూస్తానని భయం
బట్టలు ఆరేస్తే వర్షం వస్తుందని
తడిస్తే జలుబు చేస్తుందని
ఏడిస్తే అందం పోతుందని
నవ్వితే నలుగురూ ఏమనుకుంటారో అని భయం
ఇన్ని భయాల మధ్య
నేను నిన్ను మరచిపోయి
మళ్లీ ఏ కోన్ కిస్కా గొట్టంతోనో గ్రంథం నడిపి
దాన్నే ఇహలోక పవిత్ర ప్రేమని చాటింపు వేసుకొని
పనికిమాలిన యవ్వారాలు నడుపుతానని
ఒకానొక నమ్మకంతో జడుసుకున్నా
భయమంటే అంటే అంటూ నసుగుతున్నా