ఇంకనూ రావేల..

 వచ్చెను తలపుల వాకిట

వర్షము దాటిన ఋతువు

చలికి వణికిన ఉడుత ఒకటి

మరల చెట్టు తొర్రను చేరె

కాలనాగు కూడా

జంట కోసం వెతికె

పూవులు వెన్నెలను పట్టి

ముద్దుగ సుగంధము నాపై చల్లి

నన్ను సింగారించె

యుద్ధమున చేరి 

నీవు నన్ను మరచితివో

లేదా ప్రాపంచిక సుఖములేల అనుకుని

వైరాగ్యమున దూరంగా ఉంటివో

జాగు సేయక

జాబు అయినా పంపరాదురా

దొరా

వెన్నెల వంటి నీ నగుమోము ఒకపరి చూపి

మరల ఈ ప్రేమ దాసిని అనుగ్రహింపరాదురా

తప్పు ఒప్పుల ఆలోచనల సంధి కాలములో

నేను కాలాన్ని పారబోసాను

సముద్రములో చిరునవ్వును విసిరేసాను

వచ్చే దారిలో కాస్త సంతోషాన్ని తీసుకురా

చెరో సగమై

ఒకరిలో మరొకరి ఉనికిని కోల్పోయి

ఇంకోసారి మధుర యాత్ర చేద్దాం

ఇంకనూ రావేల

ఈవేళ 

నీవు లేక నన్ను నేను సంభాళించుకోలేక

ఎదురు చూస్తున్నా అని 

ఆమె అతడికి మనో సందేశం పంపింది