గాయం కధ

తన చూపుల ఆ గేయం..నిత్యమైన గాయం కద..!

పెను ఆశల నీడపైన..అందమైన గాయం కద..!

మనసుగూటి కోకిలమది..రగిలించెను మధురముగా..

తెలివిపైన వేటేసిన..చిత్రమైన గాయం కద..!

పదునుమీద అదను చూసి..దెబ్బతీసె ఏమందును..

ఏ మందుతొ పనేలేని..భాగ్యమైన గాయం కద..!

చదువలేని జీవితాన్ని..చదువగల్గు బలమిచ్చెను..

గుండెలయల నలరించే..హృద్యమైన గాయం కద..!

జాతకమే తిరగ వ్రాసి..కాల్చి రాశి పోసిందే..

ఖర్మలన్ని బూదిచేయు..దివ్యమైన గాయం కద..!