అనుబంధాలు

నాతో నేను . నా ఉన్నతికై నేను ;

 పుట్టుక ఒక వరం . జీవిస్తా అనుక్షణం .

చదువుతా విశ్వాన్ని విశ్లేషణగా ;

 సాధిస్తా ఔన్నత్యాన్ని అందరూ గర్వించేలా !

నాఇల్లు నాకు నందనవనం ;

 నవీనతతో రక్షణకై , ప్రశాంతతకై ఆ సౌధం .

నాతో సుఖసౌఖ్యాలతో నా పరివారం ;

 అతిధులే ఆభరణాలుగా విలసిల్లే నివాసం .

అమ్మ మమకారం నా జన్మకు శ్రీకారం ;

 బాల్యంలో వెచ్చని ఒడి నాకు మొదటి బడి .

నాన్న అభిమానం , రోజుకి ఒక సోపానం ;

 మరువలేం ప్రపంచానికి తను చేసే పరిచయం .

వారి మనసు విశాలం , గొప్పది త్యాగం ;

 అమూల్య సలహాలతో అనుదినం నూతనం .

వివాహితునిగా శ్రీమతి నాకొక బహుమతి ;

 హృదిలో దేవత , మధురమైనది ఆమె మమత .

జీవితంలో తన చెలిమితో ప్రతి అడుగు ;

 మా ప్రేమకు చిహ్నాలు బాధ్యతతో మెలుగు .

నిరంతర ఆత్మీయతతో సోదరసోదరీమణులు ;

 తమ అండదండలతో స్నేహితులు .

సంస్కృతి , సాంప్రదాయం అంతర్భాగం ;

 ప్రకృతి ఆరాధనతో జీవనసౌందర్యం .

నీతి , నిజాయితీతో సమాజసేవకుడిని ;

 మనదేశ అభివృద్ధిలో భాగస్వామిని .

సౌభ్రాతృత్వాన్ని సాధించే ప్రపంచ పౌరుడను ;

 భద్రతను , సమగ్రతను కాపాడే పర్యాటకుడను .

*********