ఆకు మీద సీతాకోకచిలుక

నీరసంగా తెరుచుకున్న ఆఫీసు కిటికీ

ఉక్కపోత సముద్రపు నీటిని ఉడికిస్తున్నట్లు ఉంది

నా ముఖం మీద చెమట

పని గురించా లేక నా గురించా

ఏమో ఆదుర్దా

బాదం చెట్టు ఆకులు కాస్త ఊగాయి

పిల్లగాలి నా ముఖం మీద వీచింది

ఏదో తెలీని హాయి

అచ్చుం నువ్వు నోటితో ఉఫ్ అని నా ముఖం మీద

ఊదినట్టు

నువ్వంటే నన్ను కవ్వించేందుకు ఎన్నో చేస్తావ్

బాదం చెట్టు ఆకు మీద ఒక సీతాకోకచిలుక

నల్లగా మెరుస్తూ మధ్యలో అక్కడక్కడా కాస్త ఎరుపు రంగు 

అదే నీ పెదాల రంగులాగా

ఇంకాస్త గాలి వీచేసరికి ఆకు మీద సీతాకోకచిలుక ఎగిరిపోయింది

అచ్చు నీలాగా

కిటికీ మూసేసి పనిలో పడ్డాను