"ఆగిపోయానా !, అలసిపోయానా !!"

తోటివారితో పోటీపడుతూ ...

జీవితంలో ముందుకు వెళ్లాల్సిన నేను..!

ఎందుకని లేనిపోని ఆలోచనలతో 

మధ్యలోనే ఆగిపోయాను ?

చేదు జ్ఞాపకాలను మిగిల్చిన ఇంకా ఆ గతాన్ని తలుచుకుంటూ కూర్చుంటే !

పెట్టుకున్న లక్ష్యాలు, చేరుకోలేని గమ్యాలు ప్రశ్నించవా నీ భవిష్యత్తు ఏమిటని ?

కన్న కలలు చిదిమేసి మధ్యలోనే వెళ్లిపోయిన

"ఓ మగువా నువ్వెక్కడ ? " అంటూ

తన రాక కోసమా నేను నిద్రలు మాని పగటి కలలు కంటూ ఇంకా ఎదురు చూసేది ?

నేను వలచింది గీత దాటని సీతే కావొచ్చు...!

కానీ, తాను మాత్రం నా రాతలో లేని రాధగా వంచించి పోయిందని ఇకనైనా గ్రహించలేకపోయానా...?

నా లక్ష్యాన్ని ఎవడో స్వార్థంతో కాలరాస్తే, ఆ మార్గంలో చాలా దూరం ప్రయాణించానని బాధ పడతూ ఇంకా అక్కడే ఆగిపోయానా ?

అయినా... దారితప్పిన గమ్యాలన్నీ ఏదోక గమ్యాన్ని చేరతాయని గుర్తించలేక పోయానా?

ఇంత కాలం ముగిసిన కథ దగ్గరే అలసిపోయి కూర్చున్నానా ?

పాత కథకు ముగింపు పలికితేనే కదా..

కొత్త కథకు నాంది పాలకుతానన్న విషయాన్ని గమనించలేకపోయానా ?

తోటివారంతా ఏదోక పని చేసుకుంటూ జీవితంలో రోజురోజుకీ ఎదుగుతూ స్థిరపడుతుంటే,

నేను మాత్రం ఇంత కాలం స్థిరత్వం లేని మనస్తత్వంతో ఇలా ఒంటరిగా మిగిలి దిగజారిపోతున్నానా ?

ముడ్డి కిందకు ముప్పై వచ్చినా...

ఇంకా అలా చచ్చు పడినా శవంలానే ఉంటే,

నన్నే నమ్ముకుని బ్రతికుతున్న నా తల్లిదండ్రుల ఆశలు ఇక అడియాసలేనా ?

ఇప్పటి వరకూ చెప్పిందంతా నాణానికి ఒకవైపు పైకి నేను కనిపించేది...

ఇప్పటి నుండి చెప్పిందంతా నాణానికి రెండోవైపు నా లో దాగుండేది...

అనుకోని అతిథిలా బాధ్యతలు చుట్టుముట్టగా

కొనితేరి తెచ్చుకున్న కష్టాలు చుట్టూ అల్లుకోగా

నష్టాలతో నలిగిపోతూ

వదిలేసుకున్న ఇష్టాలెన్నో కదా !

కొన్ని నా ఆలోచనలకు పదును పెడితే ,

అక్షారాలై కవితలా కురిసాయి ఇలా !

మరికొన్ని నా అతి ఆలోచనలు వాటికవే పదునెక్కి,

నా కలల రాజ్యాల్ని కూల్చేసాయి అలా !

Advertisement

మానవత్వంలో కఠినత్వం చూపించే 

ఈ స్వార్ధపు సమాజంలోనా ...

నేనీ మనుషుల మధ్య అంధత్వంతో

సమానత్వాన్ని వెతుకుతూ భావోద్వేగమయ్యేది ?

దృఢంగా లేచి నిలబడితేనే కదా నేను ఎదుర్కొనేది అలో, కెరటమో లేక ఉప్పేనో తెలుసుకునేది ?

పడినా...మళ్ళీ లేచి నిలబడుతూ,

ప్రయత్నాలకు బానిసనయ్యానా ?

ఓడినా .. తట్టుకుని మళ్ళీ పోరాడుతూ,

కన్నీళ్లను కళ్లదగ్గరే నిలుపుకున్నానా ?

సాధించడంలో, సంపాదించడంలో గెలవలేకపోయానా ?

లేక ప్రయత్నించడంలో, పోరాడడంలో ఓడలేకపోయానా ?

అసలు గెలవడంలో... నే ఓడిపోయానా ?

లేక, ఓడిపోవడంలో... నే గెలిచానా ?

నా దారిని మలిచానా ? నా గమ్యం మరిచానా ?

చుట్టాలు పట్టించుకోలేదని

స్నేహితులు మొహం చాటేసారని

సన్నిహితులు దూరమయ్యారని

నమ్మిన వాళ్లు మోసగించారని

ప్రేమించిన వారు దూరమయ్యారని

ఇంకా అలా బాధపడుతూనే కూర్చుంటే

నాకు జరిగిన ప్రతీ అవమానాలకు...

జరిమానాలు తప్పక విధించగలనా?

సన్మానాలు పొందిన ఆ రోజు నేను పొంగిపోయానా ?

అవమానాలు ఎదుర్కొన్న ఈరోజు నేను కృంగిపోయానా ?

60 అక్షరాలతో తీర్చి దిద్దిన ప్రతీ పదం

24 పదాలతో పేర్చిన ప్రతీ వాక్యం

30 వాక్యాలతో అమర్చిన ప్రతీ పేరా

12 పేరాలతో సమకూర్చిన 2024 అనే 

నే రాసుకున్న

ఈ మరో అధ్యాయం కూడా...

అంతకు ముందు అధ్యాయాలలా...

నా ప్రశ్నలకు సమాధానాలు ఇవ్వకుండానే ...

ఎలాంటి ఆర్భాటం లేకుండానే ముగిసింది !

అయినా ఆగేనా..

2025 అనే మరో అధ్యాయం వైపు

మళ్ళీ

ఈ సత్యాన్వేషి యొక్క పరుగులు..!

ఈ నిత్యాన్వేషి యొక్క అలుపెరగని పోరాటాలు.. !

Written by

- సత్య పవన్ గంధం

(mr.satya's writings✍️✍️✍️)