ରତ୍ନାକର ଚମ୍ପୂ (ଞ)

ରତ୍ନାକର ଚମ୍ପୂ

(ଚୌପଦୀ ରତ୍ନାକର)

(10)

ସଖୀ

ରାଗ - ପୁନ୍ନାଗ - ଯତି

ଆସ ଆସ ସଖୀ, ଯିବା ବାସକୁ ଗୋ (ଘୋଷା)

ଆଉ ରହିଲେ ଏ ବନେ - ଅସତୀ ବୋଲିଟି ଜନେ

ଅବଶ୍ୟ କରିବେ ଉପହାସକୁ ଗୋ (1)

ଅଖିଳ ଲାବନ୍ୟଶୀରି - ଆଉ କି ଆସିବେ ହରି

ଅରୁଣ ଭଜିଲା ପରକାଶକୁ ଗୋ (2)

ଆମ୍ଭ ଅବସ୍ଥା ସଜନୀ - ଆଗରେ ରଖି ପଦ୍ମିନୀ

ଅଧରେ ଧରିଛି ଦରହାସକୁ ଗୋ (3)

ଆନ ନାଗରୀକୁ ଧରି - ଆରମ୍ଭିଲେ ନିଶ୍ଚେ ହରି

ଅନଙ୍ଗ ରଙ୍ଗରେ ଅଭିଳାସକୁ ଗୋ (4)

ଆର୍ତ୍ତି କରେ ଜଗଦେବ - ଆଉ କି ସତେ ଆସିବ

ଅଭିନବ କୁଞ୍ଜବନ ରାସକୁ ଗୋ (5)