Library
तुझ्या आठवांनी आज मनी दाटले काहूर...
तुझ्या आठवांनी आज मनी दाटले काहूर...
1 min
317
आली पावसाची सर, उरी एक हुरहूर ।
तुझ्या आठवांनी आज मनी दाटले काहूर ।।
आला थेंब अंगावरी, गेला विरून क्षणात ।
काहीही ना बोलला तो आज माझिया कानांत ।।
कसा थेंबानंही आज त्याचा बदलला नूर ।
तुझ्या आठवांनी आज मनी दाटले काहूर ।।
सुरु झाली रिमझिम, आनंदली हि धरती ।
नाही पडला आनंदाचा टिपूसही मजवरती ।।
कुठं हरवून गेला माझ्या जीवनाचा सूर ।
तुझ्या आठवांनी आज मनी दाटले काहूर ।।
सरीवर आली सर, चिंब भिजलं हे जग ।
परि माझिया अंतरी असे शुष्कतेची धग ।।
चिंब ओल्या आसवांनी मन जाळल्याचा धूर ।
तुझ्या आठवांनी आज मनी दाटले काहूर ।।
आज अशा पावसानं जग प्रफुल्लित सारं ।
माझ्या नाशिबाच गाणं त्या साऱ्याहून न्यारं ।।
आता डोळां माझिया त्या फक्त आसवांचा पूर ।
तुझ्या आठवांनी आज मनी दाटले काहूर ।।
