જીવતા જોયા

નમીને જીવનારા પણ ખમીને જીવતા જોયા,

નિછાવર જાત કરનારા દબીને જીવતા જોયા.

ઇશારા એ થયેલી વાતને મનથી સદા માની,

મળેલી વેદના વેઠી સહીને જીવતા જોયા .

કણસતા જીવ પર આવી પડેલા ઘાતના મારા,

દગાના માર ખાધેલા બળીને જીવતા જોયા.

સદા સાચા પડે ખોટા કથનના વેણ વાઘેલાં,

સબૂતો સાચ ના આપી રડીને જીવતા જોયા.

મળેલી રાહ બદલીને કદમ ભુલા પડી ચાલે,

સફરને ખેડનારા પગ ધરીને જીવતા જોયા.

ઉથલ પાથલ જગતમાં રોજ નોખા હાદસા કરતી,

નવી રાહે નવા ચીલે ડગીને જીવતા જોયા.

થયા કમજોર માસૂમ બળ કરીને ડગમગાયા પણ,

નવા દાવે નવા ધારા ઘડીને જીવતા જોયા.