મારા ગુરૂજી

સાંભળજો વિનવું તમને આજ રે મારા ગુરૂજી,

ભવસાગરમાં ઉતારો પાર રે મારા ગુરૂજી.

ભૂલો પડ્યો છું હું આ સંસાર સાગરમાં,

જડતો નથી કોઈ આરો આ જીવનમાં,

એથી વિનવું દેખાડો રાહ રે મારા ગુરૂજી.

જ્ઞાન વિના હું ભટકું છું અંધકારમાં,

જાણે તરૂ છું હું દુ:ખનાં દરિયામાં,

એથી વિનવું આપોને જ્ઞાન રે મારા ગુરૂજી.

ગુરૂ દ્રોણ બની આવો મારાં જીવનમાં,

કે કૃષ્ણ બની આવો માર્ગ ચિંધાડવા,

એમ વિનવે ‘અર્જુન’ આજ રે મારા ગુરૂજી.