જિંંદગી અમારી નથી!!
જિંંદગી અમારી નથી!!
રોજ સામે આવે છે એવી જિંદગીને કોઇ દિ' સંભારી પણ નથી;
બસ યાદો બચી હો સ્વજનની એવી જિંંદગી અમારી પણ નથી!!
શણગાર નિતનવા સજે છે આવતા ને જતા હર શ્વાસો;
ભલે પીંખાતી હો લાગણીઓ પ્રત્યેક, કોઇ સાવ કુંવારી પણ નથી!!
મૃગજળનો આખો સમંદર છલકાઇ રહ્યો છે પણે ક્ષીતીજે;
એમાં ડબકાં ખાતી નાવમાં સવાર કોઇ અવતારી પણ નથી!!
હર લાગણી શૂન્ય થઇ જાય છે જિંદગીનાં એ અંતિમ પળે;
તોય દુઃખોથી મુક્ત કરવા માટે મૃત્યુને કોઇ આભારી પણ નથી!!
એમ કેમ કહેવાશે કે એને કાંઇ પડી નથી આ જગતનાં લોકની;
ઇશ્વર સિવાય કોઇની આમ પથ્થર થાવાની તૈયારી પણ નથી!!
કેટલો ભાર લાગે છે આમ સાવ ઇંસાન બની રહેવામાં રોજ;
એટલે ઇશ્વરે આવી જિંદગી જાણીજોઇને સ્વીકારી પણ નથી!!
ખુલ્લા પગે એકલા ચાલવાની આદત પડી છે વર્ષોથી;
એણે સાથ છોડ્યા ને પછી બીજી કોઇ લાચારી પણ નથી!!
હવે વાદળો છે સફેદ, સાવ લાગણી વિનાનાં ને સૂકાભઠ;
હવે એ નથી ને લહેરાતી એની સાડીની કિનારી પણ નથી!!
ને બસ એક જ પ્રિતમ હો આ જીવનમાં એટલી ઇચ્છા માટે-
આંસુઓની સજા હો જીવનભર એવી એ કોઇ ગુનેગારી નથી હોતી!!